دەردە دڵ

ستران عەبدوڵڵا

کتێب ژیانت کورت ناکاته‌وه‌ وه‌کو هه‌ندێک لێی تێده‌گه‌ن، یاخود هه‌ر ئه‌وه‌نده‌ی لێ تێده‌گه‌ن، چونکه‌ به‌س ناونیشان ده‌خوێننه‌وه‌. کتێب ژیانت بۆ کورت ده‌کاته‌وه‌. هه‌ڵبه‌ت جیاوازییه‌کی زۆر له‌نێوان ئه‌م دوو مانایه‌دا هه‌یه‌. یه‌که‌میان ئیدعا ده‌کرێت تۆ وه‌ختێک ده‌خوێنیته‌وه‌ و وه‌ختی خۆت بۆ کتێب خوێندنه‌وه‌ ته‌رخان ده‌که‌یت له‌ زه‌مه‌نی خۆت ده‌دزی و ده‌به‌یت. وه‌ک بڵێی کاکم ژیانی وا به‌ نرخ و قیمه‌ت بێت خوێندنه‌وه‌ له‌ داهێنانه‌کانی ده‌کات، سه‌رقاڵی ده‌کات به‌ حه‌رف و دێڕو و رێ له‌وه‌ ده‌گرێ دینار و دۆلار و تمه‌نه‌کانی بژمێرێ، که‌ سه‌یری گیرفان و قاسه‌ش ده‌که‌یت هیچی وای تێدا نییه‌ به‌ خه‌رجکردنی وه‌ختێک له‌ خوێندنه‌وه‌ زایع کرابێت له‌ مالایه‌عنیا، سه‌یری سیحه‌ت و سه‌روسه‌کوتی ده‌که‌یت ده‌زانی خۆی ته‌مه‌نی داوه‌شاوه‌ و هیچی وای نه‌ماوه‌ به‌ خوێندنه‌وه‌ و چاو هیلاککردن و مێشک جوڵاندن له‌ ده‌ستی بدات.

خوێندنه‌وه‌ ته‌مه‌نی ئه‌وانه‌ کورت ناکاته‌وه‌ که‌ ئه‌گه‌ر بیوگرافیای ژیانیان بخوێنیته‌وه‌ له‌ چیرۆکی کورت زیاتر هیچی تری تیا به‌سه‌ر نییه‌. ته‌مه‌نی کورت کتێب نایدزێ. که‌ست بینیووه‌ خۆی به‌ کوشتنی مردووه‌وه‌ خه‌ریک بکات؟ ئه‌مه‌ وه‌ک ده‌ستکاری و بێ حورمه‌تییه‌ به‌ لاشه‌ی مردوو و ته‌نی سڕبۆوه‌.

ئه‌مما خوێندنه‌وه‌ ژیانت بۆ کورت ده‌کاته‌وه‌. هه‌ر ئه‌وه‌ راستییه‌کانی ژیان و راستیه‌کانی خوێندنه‌وه‌ ده‌رده‌خات. ئاخر ته‌مه‌نت هی نوحیش بێت به‌شی یه‌ک ئه‌زموونی چڕوپڕ ناکات. خوێندنه‌وه‌ ئه‌زموون و به‌سه‌رهاته‌کانی خه‌ڵکی تر و نه‌ته‌وه‌کانی تر و جوگرافیاکانی ترت بۆ کورت ده‌کاته‌وه‌. خوێندنه‌وه‌ی کتێب گوشراوی بیر و ئه‌ندێشه‌، ئازاری ئه‌زموونه‌کانی ترت بۆ کورت ده‌کاته‌وه‌ و ده‌یخاته‌ به‌رده‌ستت. تۆ بێ خوێندنه‌وه‌ هه‌ر فریای ژیانێکی کورت ده‌که‌ویت. هه‌ر فریای ئه‌وه‌ ده‌که‌ویت ئه‌ندامی شارێک و شانه‌یه‌ک، ئه‌ندامی نه‌ته‌وه‌یه‌ک و دینێک ، زمان و زه‌مینێک بیت و ئیتر فریای هه‌ڵدانه‌وه‌ی لاپه‌ڕه‌یه‌ک ناکه‌ویت. خوێندنه‌وه‌ جوگرافیا و مێژوو، دۆڕان و بردنه‌وه‌، رۆمان و رامان و ڕاهاتنه‌کانی ملیۆنان مرۆڤت بۆ میمۆری ده‌کات و دابین ده‌کات. ته‌مه‌نی کورت به‌شی خوێندنه‌وه‌ی حیکایه‌تی نوحیش ناکات ته‌نانه‌ت ئه‌گه‌ر ته‌مه‌نی نوحیشی بۆ مسۆگه‌ر بکه‌یت. تا ته‌مه‌ن کورت نه‌بیت و ته‌مه‌نی کورتت نه‌بێته‌ گرته‌یه‌کی ڤیدیۆیی ته‌ڵخ و بێ که‌ڵک، کتێبان وه‌خوێنه‌. ته‌مه‌نت هه‌زاران ساڵ درێژ بکه‌وه‌ و ئه‌وی ماویشه‌ به‌ چڕی له‌ سایه‌ی گوشراوی کتێبه‌کاندا، پێی بژی و بۆی بژی.


PM:04:51:01/09/2019




ئه‌م بابه‌ته 240 جار خوێنراوه‌ته‌وه‌‌