ئاگادارییەکی بەپەلە لە خۆبەڕێوەبەری ڕۆژئاواوە

ئاگادارییەکی بەپەلە لە خۆبەڕێوەبەری ڕۆژئاواوە
مەوداپرێس-

خۆبەڕێوەبەری دیموکراتی هەرێمی جەزیرە ئاگاداریەک ئاڕاستەی خەڵکی جەزیرە دەکات کۆببنەوە ، بۆئەوەی بەرەو تەل تەمر و سەرێکانی بەڕێبکەون.

لەئاگادارییەكی بەپەلەدا خۆبەڕێوەبەری هەرێمی جەزیرە داوا لە هاوڵاتیانی هەرێمەکەی دەکات کۆببنەوە بۆئەوەی بەرەوە سەرێکانی و تەل تەمر بەڕێبکەون بەشێوەی بەکۆمەڵ بەمەبەستی یارمەتیدانی هاوڵاتیان و بریندارەکانی ئەو شارانە.

هاوكات هێزەكانی سوریای دیموكرات رایگەیاند، دوای راگەیاندنی ئاگربەستیش بۆردومانەكانی توركیا بەردەوامە و بەوهۆیەشەوە 13 شەڕڤان و پێنج هاوڵاتی سڤیل شەهید بوونە. 
 
لەلایەكی دیكەوە ئەنجوومەنی سووریای دیموكرات رایگەیاند، توركیا ئاگربەست پێشێل دەكات و داوای چاودێری نێودەوڵەتیش دەكات.

ئەنجوومەنی سووریای دیموكرات (مەسەدە) لە راگەیاندراوێكدا ئاماژەی بەوەكردووە، ھەسەدە پابەندی ئەو ئاگربەستە بووە كە بە ناوبژیوانی ئەمەریكا راگەیێندراوە، بەڵام توركیا پابەند نەبووە.

مەسەدە باسلەوەشدەكات "بە رای گشتی كۆمەڵگەی نێودەوڵەتی دەڵێین، ئامانجیان پاراستنی خەڵكی سڤیل و وەستاندنی كۆچبەرییە، لە پێناو پاراستنی یەكیێتی خاكی سووریاش ئاگربەستیان پەسەندكردووە".

راشیگەیاند، داوا لە نەتەوە یەكگرتووەكان و یەكێتی ئەوروپا و كۆمكاری عەرەبی دەكات، چاودێری نێودەوڵەتی رەوانەی باكووری سووریا بكەن، بۆ گەرەنتیكردنی پاراستنی ئاگربەست.



PM:01:21:19/10/2019