ئێران بێدەنگە
ئیسرائیل تاكە دەوڵەتە بەردەوام ئێرانییەكان دەكوژێت

ئێران بێدەنگە<br>
ئیسرائیل تاكە دەوڵەتە بەردەوام ئێرانییەكان دەكوژێت
مەوداپرێس- تاژان عوسمان

راپۆرتە رۆژنامەوانییەكان ئاماژە بەبوونی هێرشی ئاسمانیی ئیسرائیل بۆ سەر بەشێك لە بنكە و بارەگا و كۆگاكانی چەك و تەقەمەنی حەشدی شەعبی دەكەن لەناو خاكی عیراقدا، هەروەك زانیارییە هەواڵگرییەكانیش ئاماژەیان بەوەكردووە كە ئێران دەیەوێت عیراق بكاتە جێگرەوی سوریا بۆ هەڕەشەكردن لە ئیسرائیل.

رۆژنامەی مەعاریفی ئیسرائیلی كە یەكێكە لە رۆژنامە بەناوبانگەكانی ئەو وڵاتە لە راپۆرتێكی شیكارییدا ئاماژەی بەناكۆكییەكانی نێوان ئیسرائیل و ئێران كردووە و سەبارەت بە هەڕەشەكانی ئێران لە وڵاتەكەیشی رایگەیاندووە ئێران ناتوانێت هێرش بكاتە سەر ئیسرائیل.

سەبارەت بەهێرشە بەردەوامەكانی ئیسرائیل بۆ سەر ئامانجە ئێرانییەكان لەنێو خاكی سوریا، ئەو سەرچاوەیەی قسەی بۆ رۆژنامەی مەعاریفی ئیسرائیلی كردووە وتوویەتی "لە جیهاندا ئیسرائیل تاكە وڵاتە بەردەوام ئێرانییەكان دەكوژێت، هەروەها سەدان جار شكستمان بەهەوڵی خراپی ئێرانییەكان لە سووریا هێناوە، خۆیان چەند جارێك جار دانیان ناوە بەو راستییەدا، هەندێك جاریش رۆژنامە بیانییەكان هێرشەكانیان ئاشكراكردووە".

سەبارەت بە وەڵامنەدانەوەی ئێرانییەكان بۆ هێرشەكانی ئیسرائیل هۆكارێكی گرنگ خراوەتەڕوو و تیایدا هاتووە "پێمان وانییە ئێران وەڵامی هێرشەكانی ئیسرائیل بداتەوە، هەڵبەت ئەمە پەیوەندی بەوەوە نییە ئێران توانای سەربازیی نییە، بەڵكو ئەوان دەزانن ئیسرائیل چەندە جددییە لەو پرسانەی كەپەیوەندیدارن بە ئاسایشی نەتەوەییەوە‌". 


PM:01:39:24/08/2019




ئه‌م بابه‌ته 540 جار خوێنراوه‌ته‌وه‌‌